أماكن شراء عطور في مصر

أماكن شراء العطور في مصر

إدارة الموقع: الرجاء مراجعة الموضوع التالي المنشور في مارس 2019 للوقوف على أحدث المستجدات ( شراء العطور في مصر ) أو واصل القراءة إذا كنت تبحث عن إجابات قديمة قبل تعويم الجنيه المصري.

أماكن شراء العطور في مصر، أماكن بيع عطور في مصر : : اشترى العطور منين ؟ : : انا من مصر والحقيقة اللى شجعنى اسجل فى الموقع انى بشم رائحة عبيرية عطرية رائعة كلما تصفحت فيه، ولكن من اللى قريته عندوكوا فى سؤال بيحيرنى اكتر ، اشترى العطور منين ؟ وهقولوكوا على الخيارات الآتية :

1- احد المحلات الكبيرة بس الاسعار زى ما انتوا عارفين !
2- صيدلية بتأكد ان المنتجات اللى بتبيعها اصلية واسعارها اقل حاجة بسيطة
3- محلات عطور فى وسط البلد (اسعار اقل من الصيدلية بس مش متاكد بتبيع اصلى ولا لا)
4- موقع زى ستروبري نت او فراجرانس إكس ، اسعار جيدة بس مش عارف بعد الشحن والجمارك هتبقى مستهلة ولا لا، خاصة ان الاستاذ رحال كان بيقول ان الواحد يعمل حسابه فى 30 -35 % زيادة عن الاسعار الموجودة فى الموقع نتيجة الشحن والجمارك
5- عطور تركيب رخيصة من محل كوس يؤدى الغرض
محتاجكوا تفيدونى لانى بقيت بحس انى عندى هاجس بقالى اسبوعين

مع تحيات أبو كمال

مواقع عالمية موثوقة لبيع العطور عبر الانترنت

58 تعليق

  1. الي اخي ابو كمال تحياتي لك
    اولا:المحلات باهظة الثمن مثل مزايا و فورشن في سان ستيفانو و تنتر بوينت في كارفور
    ثانيا:صديق لي طبيب يعمل بصيدليه في سموحه امام الوحيد اقسم لي انهم يشترون العطر من 10 الي 15 جنيه و بيبعوها من 400 الي 600 جنيه و للأسف اغلب الصيدليات يفعلون ذلك
    ثالثا:يوجد في فتح الله قسم للعطور الغير اصليه و قسم اخر للعطور الاصليه
    و هو ارخص علي الاقل من 50 الي 100 جنيه حسب البرفيوم
    و هذا ما ارشحه
    اخيرا:تحيه الي النشطين دائما استاتذتي محمد جاد- مالك -نورانيوم-فلاح
    و الي جميع اعضاء المنتدي

  2. السلام عليكم

    اخي السائل بارك الله فيك

    بالنسبه للاماكن المناسبه حبيبي افضل الاماكن الرسميه يعني اذا عندك قدره تشتري من الوكاله فهو افضل بكثير خااااصة اذا كنت من الموسوسين في ان هذه العطر اصلي ومش اصلي درجه اولى او ثانيه يعني زيي كده … ولو السعر مرتفع نوعا ما بس الاراحه النفسيه الي تحصل والطانينه ارى انها تستاهل.
    اما بالنسبه للمركبه فلا انصحك بها ابدا لانها ضاره ضاره ضاره اكثر من كونها نااافعه غان كنت فاعلا ولا بد خذ لك حبيبي من الرحاب او درعه يعني من هذه الي تكون درجه ثانيه بس اصليه .

    اخي اسامه بارك الله فيك وفي جميع الاخوان النشطين

    اما بالنسبه لتعليق الاستاذ الكريم رحال على شراء عطور من fragrance.x فهو مرجع هااام لمن يريد شراء عطور من الخارج يرجى مراجعته بشكل دقيق لتعم الفائده ..

  3. اخي اسامه الله يحفظك ممكن مثال ع عطر يشتروه الصيدليات ب 15 جنيه ويبيعوه ب 600 جنيه بصراااااااااااحه ما قدرت استوعب الفكره … لان السعر العالمي جدا متقارب في العطور الماركات العالميه .

  4. يوجد محلات الفوال في القاهرة وفي نفس الوقت يوجد تخفيضات خاصة لأعضاء موقع نورانيوم

  5. تحياتي اخي مالك بالنسبة للسعر العالمي اضرب لك مثال بسعر الهابت روج ماء تزين في موقع فراجرانس إكس بـ 39 دولار حسب كلام الأخ رحال يعني بـ147 ريا ل سعودي وعندنا في السعودية في باريس جاليري تقريبا بـ 370 ريا ل سعودي يعني الفرق 223 ريا ل وكذلك سعرعطرك المفضل لانوي من سان لوران السعر العالمي تقريبا بـ 290 ريا ل وفي باريس جاليري بـ 380 ريا ل يعني الفرق 90 ريا ل يعني مبالغين في اسعارهم بشكل غير طبيعي مع انة لا يوجد ضرائب عندنا والجمارك طفيفة وكلة كوم وفافافووم كوم

  6. فى مصر الصيدليات الكبيرة بتبيع عطور أصلية زى عبد القصود و على ايمدج و كدة يعنى اللى هى صيدليات فيها قسم أدوات التجميل 🙂
    و دى بتبيع العطور بسعر أقل من مزايا و غيرها من المحلات الكبرى !!
    كمان فيه فى شارع عثمان ابن عفان فى مصر الجديدة محلات ميك اب و اكسسورات بتبيع عطور أصلية حريمى و رجالى الى جانب العطور التقليد بس بتبيعها بسعر أرخص من 100 الى 200 جنيه عن مزايا و ممكن تتأكد اذا كان العطر أصلى و لا لأ من العلبة و الزجاجة بتشوف الكلام اللى عليها مكتوب صح و لا لأ !! هو فيه طريقة حلوة انت ممكن تروح مزايا مثلا تشوف العطر اللى عاجبك و تقلب فى العلبة بتاعته و شكل الزجاجة و كدة و تميز العطر الأصلى بعد كدة تروح المحل اللى بيبيع أرخص و تتأكد اذا كانت البرفان أصلية و لا لأ 🙂

  7. الي اخي مالك
    كما اشار اخي ابو يحيى بالفعل و ازيد
    hugo boss orange and white
    سعر الواحد يبدأ من 450
    azzarow 1978 الرائع اغلي من ذلك
    والهابت روج في مصر بحوالي 680 جنيه
    بالطبع كنت عايز اقول بتتباع من 2500 الي 12000 بس خفت من المبالغه
    تحياتي لاخي مالك

  8. طيب اشكركم يا حبايبي ع التوضيح بارك الله فيك ابا يحي واسامه بس فيه قصه حصلت لصديق لي في جده . في مره من المرات زوجته ارادت اهدائه عطر قيفنشي فرش اتيتيود فراحت ياعيني على نياتها اشترته من الخاسكيه المهم واهدته له في اليوم الثاني جربه وكل شيء فقال لي يا اخي الرائحه نفسها بس مره ما تدوم فسالها من وين انت اشترتيه وبكام فقالت له من كذا كذا وبسعر 95 ريال سعودي فقال هااااااااه … وراح بعد يومين اشتره من فافا فوم بسعر 380 ريال وقال لي تعرف هذا رائحته مره حلوووووه ويدوووووووووووووم بشكل طويل ….

    لكن ان كان كذلك فالاسعار جدا مبالغ بها والله يعينكم ياررررب.

  9. فى اختيار اخر وهو شركة مصر للاسواق الحرة هل فعلا اسعارهم افضل من المحلات الكبرى خاصة انى لا اعتقد فى انهم ممكن يغشوا العطور ايه رايكوا، وبالنسبة لمحل الفوال ازاى احصل على الخصم هل لو روحت وقولتلهم انا عرفكوا من موقع نورانيوم بس وهل الخصم 25% ولا بيوصل 25% سؤال كمان هل اسعارهم افضل من المحلات المشهورة التانية، ولو حد جرب موضوع الصيدليات الكبيرة يا ريت يقولنا وفى انتظار ترشيحاتكم ومتشكر لكل الردود من بره مصر او من مصر، واكيد طبعا اخونا اللى مجمعنا نورانيوم

  10. صيدلية العزبى اسعارها كويسة واصلية 100%…كمان فى سنتر شيك علام اسعاره ممتااازة جدا وعطورة اصلية دول اللى اضمنهم جداا جداا وعن تجربة من ناحية السعر وكون العطر اصلى

  11. شكرا عادل باشا ولكن فين سنتر شيك علام

  12. السلام عليكم و رحمة الله و بركاته

    الأخ ابو كمال
    بالنسبة لعملية الشراء ليست سهلة بالمرة لأنها تحتاج لبناء ثقة فى البائع و على هذا امامك اختيارات :
    1- مزايا / Faces / دبنهامز / سنتر بوينت / سيفوريا
    2- محلات وسط البلد
    3- الصيدليات
    4- الشراء من النت (بسبب الصعوبات فى مصر)
    5- الأسواق الحرة (تحتاج جواز سفر لشخص حديث الوصول أو تدفع المعلوم)
    6- الشراء عبر تجار الجملة (و هذا يحتاج ألى بناء ثقة و تجربة اكثر من مرة)

    عملية الشراء السليم و الصحيح تحتاج خبرة و تجربة و معرفة.
    لذلك انصحك بالتدرج من المحلات الكبرى ثم محلات وسط البلد ثم المصادر الأخرى، الصيدليات الكبرى و ما شبه تكون أغلى من مصادر وسط البلد.

    عن نفسى لدى مصادر جيدة و بأسعار ممتازة جدا سواء فى القاهرة أو الإسكندرية، و ليس لدى مشكلة فى مشاركتها معكم و لكن يجب الأذن من إدارة الموقع اولا.

    دمتم بود سالمين

  13. السلام عليكم

    اخي طاررق شكرا حبيبي لافادتك المهمه وخاااصة السوق الحره يا اخوان السوق الحره اذا اسعارها مناسبه ادفع المعلوووووم ع قولة اخي طارق وروح جدا مضمونه وممتازه ويله كمان تحس انك جاااي من السفر خخخخخخخخخخخخخخ.

  14. مالك سلطان العطور و الممالك 😀

    الأحساس بالوصول من السفر ممتع و لذيذ جدا و خصوصا عند العودة لأرض الوطن (حتى و أن كان وطن وطنطن يا طنطن على رأى حسن كامى فى أغنية انا وطنى بنشد وبطنطن وبنادى بحبك يا وطنطن)..

    ما علينا

    عطور الأسواق الحرة تمتاز بالثقة الكاملة فى المصدر و يعيبها انها تباع بالسعر العالمى للعطر فى حين أنه داخل الدولة ارخص من ذلك و حتى هذه اللحظة لم أفهم كيف ذلك ؟؟؟؟؟؟؟؟

    تجربة الشراء من السوق الحرة كانت مع HUGO XY و Euphoria Men Intense و كان سعرهم بالدولار طبعا 😀

    فى حين ان قمت بشراء Euphoria Men Intense من مصر من احد محلات وسط البلد بأقل 250 ج.

    لو حد عارف يفهمنى ازاى.

    شكرا ملوووووووووووك ملك الملوك و الحداثة و كل ما هو جديد 😀
    بمزح معك لا تكشر هااااااااا

  15. أهلا بكم اخواني و شكرا على تعليقاتكم المثمرة 😀

    أولا فيما يخص محل سنتر شيك علام وهو بالاسكندرية شارع صفية زغلول خلف سانتا لوتشيا 😀 فصاحب المحل و للعجب طلب مني عدم الاشارة له على الموقع !!!! ولعل السبب هو تدفق الزبائن عليه بشكل مفاجيء 😀

    ثانيا : فيما يخص الشراء عبر الانترنت فكما يتضح من تجربة أخونا رحال أن الأمر يستحق المغامرة و التجربة خصوصا في العطور النادرة و الباهظة الثمن و التي بصعوبة تجدها في السوق المحلي أو التي يغالي أصحاب المتاجر الكبرى في سعرها .

    ثالثا : يفضل كما قال أخونا الكبير طارق أن تشتري أولا من المتاجر الكبرى الموثوقة ، ولو بسعر أعلى حتى تتقن فن التعرف على العطر الأصلي وبعد ذلك أشتري من أي مكان كان .

    رابعا : محلات الفوال ، في الفرع الجديد فقط و لنهاية يناير 2011 تخفيض 25 % لزوار موقع نورانيوم .. فقط قل اطلب من البائع الخصم الخاص بزوار موقع نورانيوم . إذا صادفتك أية مشاكل برجاء الاتصال بنورانيوم عبر صفحة اتصل بنورانيوم .

    خامسا : موضوع عطر ب 15 جنيه و يباع ب 400 أو 600 فهذا أما تهريج أو كلام عاري تماما عن الصحة ولو صح ، فالعطر مزيف و البائع معدوم الضمير .

    سادسا : لا أنصح بشراء العطور المركبة ولا العطور المزيفة ، كما أوضح أخونا مالك حفظه الله .

    سابعا : ثبات العطر لا شأن له بكونه أصلي أم لا . فمفهوم الناس لثبات العطر خاطيء . ماء التزين يثبت على البشرة 2 ساعة . ماء العطر يثبت على البشرة من 3 إلى 4 ساعات . كل عطر له استخدام و مكونات العطر و الغرض الذي أعد له يحكمان المسألة . أسم صانع العطر عليه عامل كبير . ارتفاع سعر العطر قرينة على نقاء المكونات و الجهد المبذول في صناعة العطر ولا شأن له كقاعدة عامة في ثبات العطر .

    شكر كبير لكل من شارك في الموضوع . تقبلوا تحيات نورانيوم

  16. توضيح للشق الأول من البند سابعا 😀
    المقصود لا تتوقع من العطر الأصلي أن يدوم للأبد أو أن يشمه الجيران في العمارة حيث تسكن 😀

  17. شكرا شكرا شكرا

    استاذي العزيز نورانيوم اشكرك ع التوضيح .
    استاذي الغالي طارق امووووووووووووووت في طنطن بصراحه .
    اما انك تشتري العطر بسعر عالمي معروف يعني بسعره الدولي من بلد المنشاء ويكون داخل بلدك ارخص ولو بخمسه دولار هذي فيها ان واخواتها واريد فهمها.

  18. السلام عليكم
    لا فض فوك حبيبي نورانيوم علي كلامك الرائع علي النقطة السابعة
    كلام قليل ولكن في االصميم
    قليل منك يكفيني …ولكن قليلك لايقال له قليل
    نعم فهم خاطئ جدا لمسألة ثبات العطر مع انه اصلي ام لا
    فكم من العطور المركبة اكثر ثباتا بكثيييييييير من عططورها الاصليه ولكن شتان بين هذا وذاك من حيث نعومة العطر وصفائة وطبيعيته ونغماته المتنوعة
    من الاخر ليس هناك مقارنةابدا
    دمتم بخير

  19. بارك الله فيك أخي الحبيب السكندري على المداخلة القيمة . و شكرا على لطفك و ذوقك الرفيع . جزاك الله خيرا

    أبو كمال الغالي 😀 أتمنى أن ترسل بعنوانك لأستاذنا طارق عبر الرسائل الخاصة من داخل الموقع ، لأن نشر البريد الالكتروني ممنوع . شكرا لتفهمك .

  20. ملوكى حبيب قلبى

    السعر العالمى دا سعر مستهلك صح ؟ مش سعر تاجر 😀

    نسبة المكاسب فى العطر الواحد 50% معلومة مؤكده من مستورد، فى مصر سعر ال $ فى السوق المصرفية هو 5.8 جنية فى حين ان المحلات الكبرى تتعامل على سعر استيرادى 8.1 جنية 😀

    بمعنى عطر سعره 50 $ يبقى سعر محلى 50 دولار مضروب في 8.1 جنيه = 405 جنية في حين سعره عالمى 290 جنيه و السعر العالمى للتاجر و المستورد يكون فى حدود 25 $ و لهذا السبب تجد تباين و خصومات كبيرة من المواقع الأجنبية فى الأسعار و اكبر دليل على هذا هو عروض الكريسماس و بتكون خصومتها مهولة.

    يوجد محلات كثيرة تبيع بالسعر العالمى دون معاملات التحويل الرهيبة بغض النظر عن قضايا الجمارك و الضرائب و الأيجار و المرتبات و الدعاية و الأعلان و خلافه، فهم فى الأساس لهم نسبة ربح على سعر المستهلك العالمى و لكن …………… طبيعة التجار المصريين “على الأقل”

    أخى مالك هل تتوقع أنى اى موقع اجنبى يبيع عطور لا يكسب ؟؟؟ و بنسب مكاسب محترمة ايضا ؟؟؟

    لكن اختلاف الرؤيا و اختلاف المنهج فى التعامل مع السوق بيننا و بينهم يولد هذا الكم الرهيب من المكاسب.

    انا لا اتحدث عن معلومات و كلام مرسل بل عن نتائج و حقائق مؤكده فى كافة المجالات.

    على سبيل المثال أخونا رحال اشترى فان كليف بسعر 30 $ + نسبة التكاليف (36% النسبة الأعلى) اصبح السعر 40.8 $ بدون تكاليف ادارية اخرى ، يعنى سعرها بالمصرى 236.64 جنية فى حين انها فى مزايا و ما شابه سعرها 550 جنية و فى السوق الموازى “كما اسميه” سعرها فى حدود 320 الى 380 جنية.

    و من واقع المثال يتضح ان التاجر العادى يكسب من 83 ألى 143 جنية أذا افترضنا جدلا انه اشترها بنفس سعر اخونا رحال الذى اشترى عبوة واحدة فقط…

    من الأخر احنا بنتسرق علنى فى العطور و مش العطور فقط و لكن فى كل السلع المستوردة فى مصر.

    نظريات اقتصادية بحته، و يمكن لأى احد من الأخوة الذين يعملون فى مجال الأستيراد و التخليص الجمركى شرح سعر الدولار الأستيرادى اكثر منى.

    بااااااااى

  21. هع … كده انت كشفت التجار علني الله يجازيك يا عم طارق 😀 طبعا كان بودي اقول من الاخر اشتروا من فراجرانس اكس و ستروبري نت بس اخاف يقولوا بيروج ليهم 😀

  22. انا عايز اشتري برفان وموجود عند الفوال اللي في وسط البلد انا عايز اعرف هل هو موثوق فية 100%

  23. فى الاسكندرية بجد-من تجربة شخصية-سنتر شيك علاام عطوره اصلية مية فى المية واسعاره كويسة جدااا بعد الفصال 🙂

  24. هو في محل بس سر خطيييييييييييييييير بجد تحفة ويستحق التجربة اسمه قصر ظاظا ودة في مصر في شارع بورسعيد في الازهر يستحق التجربة اسعرهم تحفة تحفة تحفة و اسعرهم لاتصدق علي الاطلاق بس للاسف معندهمش كل حاجة يريت ياجماعة تجربوه هو محل صغيير جدا بس اسعاره تحفه

  25. بالفعل قصر ظاظا في الموسكي بس برضه عيبه إن مش عنده كل حاجة وأسعاره رخيصة

  26. هشام المحترف

    حد يعرف سعر لانوى كام فى مصر

  27. السلام عليكم الموقع ده حلو اوى ومفيد للغاية بس كنت عاوزة اسال عن محلات الجملة للعطور وادوات التجميل فى القاهرة ياريت لو حد يعرف يقولى

    واشكركم على المعلومات القيمة اللى استفادناها من هذا الموقع

  28. طيب ممكن أعرف سعر برفيوم كوكو شانيل وأفتر ناين وتشانس وروك ان روز فالنتينو

  29. السلام عليكم يا شباب … بجد انا مصدوم منكم … انا ابتديت فعلا اشم روائح بس من كلامكم … و انا عاوز اشتري Pacco Rabanne One Million . ايه افضل مكان ليها و سعرها كام ؟

  30. اخ زوما فى اخونا القيصر معانا عالمدونة وليه صفحة عالفيس بوك وحاجته ممتازة ومضمونة جدا واعضاء كتييير جدا اتعاملت معاه وانا منهم اسم صفحته
    world of original perfumes

  31. لو سمحتم فين عنوان محل الفوال بالضبط
    ومحل قصر ظاظا ؟؟
    وهل حاجاتهم مضمونه ؟؟

  32. قصر ظاظافي شارع بورسعيد ناحية الموسكي
    الفوال فى فرع فى عبد اخالق ثروث فى وسط البلد وفرعين فى فيصل واحد عند كلية التربية الرياضية وواحد قبل الطالبية
    لو العناوين مخالفة لشروط الموقع او تعتبر دعاية برجاء حذفها ونشرها للافادة فقط

  33. نقطة مضمونة او مش مضمونة دى ترجع لتجربتك لان الواحد بيتوهم
    بس ساعات بعض محلات وسط البلد بيعمل حركة بايخة انه يفتح زجاجة لزبون معرفة يشمها ويرجعها تانى ويقفل السلوفان

  34. بصراحة ستراوبيرى نت أرخص حاجة فى العطور العادية والنيش كمان والجمارك بترجع بس لازم يكون عندك فيزا كارت انا عملت من عندهم اكتر من ٣٠ اوردر فى آخر ٥شهور الاوردر بيصل بعد حوالي ٢٠ يوم بالكثير. والتأخير بيبقى فى الجمارك المصرية حوالي ٦٨/١٠٠ بس لما تبعت لهم صورة الايصال الفلوس بترجع بعد يومين اوثلاثة لحسابك

  35. بيرجعولك الجمارك ( 68%) ؟؟؟؟؟
    ازاى !!
    دول يبقوا ناس طيبين قوى يا خال !!

  36. فعلا بيرجعوا الجمارك انا جربتهم فى حوالي ٠٣ اوردر

  37. ايسل وسام الاغا

    السلام عليكم ممكن معرفة شركة لبيع العطور التركية جملة وشكرا

  38. شريف محمد

    قصر ظاظا عطوره ليست اصلية تعبئة الامارات

  39. محمد قرشى

    هناك محلات رضوان العجيل في القاهرة لديهم فروع في الزمالك وفى مصر الجديدة رأيت لديهم الكثير من العطور الحديثة بما في ذلك بعض عطور جيرلان ولكنى لا أعرف عن الأسعار، أعتقد أنها ستكون أرخص من سنترات العطور المعروفة.

  40. حرام عليك يا استاذ شريف التشكيك فى ذمم الناس .
    بحكم معرفتى الخاصة باصحاب محل ظاظا جميع عطورهم اصليةوهذه شهادة لوجه الله
    عيبهم الوحيد قلة الانواع وهم معذورون لاسباب لا يتسع المجال لذكرها.

  41. يا ريت حد يفيدنا في قصر ظاظا هل فعلا حاجته اصلي
    و لا ايه نظامه
    لأن شايف اسعاره رخيصه جدا

  42. فعلا اخى محمد على قصر ظاظا حاجته اصليه 100% و لا تقلق و ذلك بشهاده كثير من الاعضاء

  43. يعني اتوكل على الله و اجيب من عنده
    اسعاره حسب ما سمعت اقل كثير من المحلات
    يعني مثلا اسعار عطور الرصاصي عنده
    تقارب الاسعار في الامارات و السعوديه

    عموما ستكون لي زياره عما قريب لهذا الكنز ان شاء الله

  44. انا بلنسبه الي حبيت كتير اسعار اولاد العجيل مثل رضوان العجيل اسعارهم مميزة ومعقوله وبيرفيو اورجينال 100%

  45. هوا لما اكون في مصر وعايز اشتري من ستروبري.. الحاجة بتوصلني عن طريق ايه؟

  46. لو سمحتم انا نفسي اجيب برفان بروفسي ويكون اصلي ومش عارفة أجيبه منين ولا سعره كام

  47. أنا قادم من لبنان بهدف تسيوق منتج عطر لبناني (ديودوران و عطور) و حابب أعرف مين المستوردين الموثوقين في مصر (أسواق الجملة)؟ شكراً

  48. الاتصال تلفونيا
    اترك رقمك مع الشكر

  49. لو سمحتم أنا عايز عطر اسمه عطر النيفيا ممكن لو في حد يعرفني مكان وجودو

  50. لو سمحتم يا جماعه لو حد يعرف اماكن بيع للعطور جمله
    فى القاهره او اسكندريه او طنطا يقولى
    وخصوصا نوع مسك اسمه مسك الطهاره
    وشكرا ليكم

  51. شيماء يحيى

    السلام عليكم و رحمة الله
    للأسف موضوع مسك الطهارة كثر فيه الغش و المغالطات و المشاكل ولذلك سأقول رأيي الشخصي فيه و هو ليس ملزماً لأحد
    جاءت تسمية مسك الطهارة من حديث الرسول عليه الصلاة والسلام لسيدة جاءت تسأله عن كيفية التطهر بعد الحيض فشرح لها كيف تغتسل و بعد أن تنتهي من الإغتسال تحضر قطعة من القطن أو الصوف معطرة بالمسك و تتبع بها أثر الدم . بالنسبة للأحكام فالإغتسال واجب مثل غسل الجنابة أما التطيب بالمسك مستحب .
    كان المسك أيام الرسول عليه الصلاة و السلام نوع واحد طبيعي لا يدخل فيه مواد صناعية و هو مسك الغزال وهو سائل و لونه أسود وما يباع حالياً هو مسك أسود سائل بأسعار مرتفعة جداً سعر التولة 1650 ريال أو أكثر و هو مزيج من عدة أنواع من المسك ولو دخلت أحد محلات العطور و طلبت مسك الطهارة سيقدم لك كل منهم شيء مختلف إما سائل أسود يتكون من المسك مضاف له عطور أخرى عبد الصمد القرشي مثلاً لديه خمس أنواع من المسك الأسود فقط . قد يبيع لك متجر آخر المسك الأبيض على أنه مسك الطهارة و هو مسك يأتي من الصخور رائحته باردة و نظيفة و هو ليس المسك المقصود في الحديث و يوجد زيوت مسك فاتحة بيضاء تأتي من النباتات و الأدهى من ذلك توجد كتل شمعية صلبة تباع انها مسك الطهارة و هي لا تصلح إلا أن تستخدم كفواحة معطرة للأدراج و طبعاً إستخدام مثل هذه المواد الصناعية قد يسبب مضار لا حصر لها لو تم وضعها على هذه الأماكن الحساسة . فما هو الدافع لشراء شيء كثر فيه الغش و العبث و إن كان هو المسك الأصلي فهو باهظ الثمن و إن لم يكن كذلك فهو ضار يسبب إلتهابات و أمراض في سبيل تطبيق شيء مستحب غرضه التعطير ففي زمن الحديث كان الإغتسال بالماء فقط لا يوجد صابون و لا منتجات الإستحمام ذات الروائح الرائعة المتاحة الآن و الدليل أن الغرض منه التعطير أن إستخدام المسك لم يذكر في غسل الجنابة للنساء ولا الرجال إذن فهو ليس ركن اساسي للطهارة بل أضيف لغسل التطهر من الحيض لإزالة أي روائح متبقية منه.و الله أعلى و أعلم فمن لديه ثمن المسك الأصلي و يثق في مصدره بنسبة 100% فهنيئاً له به و له الأجر و الثواب إن شاء الله و فيما عادا ذلك فهو مخاطرة لا داعي لها.

  52. هي المحلات دي جملة و لا تجزئة

  53. في مواقع زي جوميا وسوق دوت كوم ممكن حضرتك تجربهم , انا عن نفسي جربت من شركة فيولا حاجتهم هاي كوبي والاسعار مناسبة بالنسبة للجودة صفحتهم علي الفيس اسمها Viola-Perfumes لو حضرتك حابب تجرب

  54. فين فى إسكندرية من فضلك

  55. انزل اى فرع من فروع شركة زمانى للعود والبخور هى من افضل واصدق شركات العطور على الاطلاق وكمان اسعارهم لا تقارن

  56. لو عاوز اشتري كذا قطعة انفكتوس اكوا مين الوكيل ف مصر اللي اقدر الاقي عنده

  57. بعد اذنكم ممكن اسم برفان رجالي يكون جميل ومميز وسعره معقول

  58. هويدا:

    الرجاء مراجعة الموضوعات التالية و التعليقات الواردة عليها، اضغط هنا و هنا و هنا

    عن تجربة (في مصر)، قليلة هي العطور التي تظهر رائحتها و تفوح لفترة طويلة، نظرا لتلوث الهواء بعادم السيارات و الزحام الشديد. تلقيت المديح في مصر على العطور التالية:

    لينستان دو جيرلان ماء العطر (تجديه لدى مزايا و معارض العطور الكبرى الشهيرة في المولات التجارية)
    آبي روج ماء العطر (تجدينه في نفس الأماكن المشار إليها سلفا)
    دنهل ديزاير (الأحمر)
    بوجار بور أووم
    يوب جامب Joop Jump
    يوب أووم Joop Homme

    طبعا بعد إنخفاض سعر الجنيه في مصر (نوفمبر 2016) لم يعد هناك أي عطر بسعر معقول! لكن الثلاثة عطور الأخيرة أقل سعرا من العطرين الأول و الثاني، و تجدينها لدى محلات بيع العطور الصغيرة في وسط القاهرة و الأسكندرية و كذلك أونلاين في مصر.

    تحياتي

    تحياتي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *